August 11, 2022

रत्न मन्दिर र हिमागृह खुला गर्न माग

कास्कीका पर्यटन व्यवसायी सङ्गठन नेपालले पोखराको रत्न मन्दिर र हिमागृह खुला गर्न सङ्घीय सरकारका संस्कृति, पर्यटन तथा नागरिक उड्डयनमन्त्री जीवनराम श्रेष्ठसमक्ष माग गरेका छन् ।

सङ्गठनका गण्डकी प्रदेश अध्यक्ष गणेशराज पहारीले बुधबार पोखरामा मन्त्री श्रेष्ठलाई ज्ञापनपत्र बुझाउँदै विगतमा पूर्वराजपरिवारका सदस्यले प्रयोग गर्ने गरेको र हाल नेपाल ट्रष्टको स्वामित्वमा रहेका यी दुई दरबार सर्वसाधारणका लागि खुला गरी उद्यान एवं सङ्ग्रहालयका रुपमा रुपान्तरण गरेर अवलोकनको व्यवस्था गर्न माग गरे ।

पर्यटकीय नगरी पोखरास्थित फेवाताल किनारमा अवस्थित रत्न मन्दिर र हिमागृह खुला गर्न यहाँका पर्यटन व्यवसायीले डेढ दशकअघिदेखि माग गर्दै आएका छन् । यी दुई दरबार सर्वसाधारणका लागि खुला भएमा पर्यटकीय गन्तव्य बन्ने र पर्यटकको पोखरा बसाइँ लम्ब्याउन सहयोग पुग्ने पर्यटन व्यवसायीको भनाइ छ ।

यसैगरी पोखरालाई यथाशीघ्र पर्यटकीय राजधानी घोषणा गर्नुपर्ने र पर्यटनलाई राष्ट्रिय प्राथमिकता प्राप्त उद्योग घोषणा गरिनुपर्ने माग पर्यटन व्यवसायी सङ्गठनको छ । होटल प्रतिष्ठान (उद्योग) सरह व्यक्तिगत नाममा रहेका होटल प्रतिष्ठानलाई पनि विद्युत् महशुल शुल्कमा प्रदान गरिएको छुट तथा सहुलियत प्रदान गर्न र होटल उद्योगलाई उत्पादनमूलक उद्योगसरह सेवासुविधा प्रदान गरिएको हुँदा सो सुविधालाई यथाशीघ्र कार्यान्वयनमा ल्याउन ज्ञापनपत्रमा उल्लेख छ ।

पृथ्वी राजमार्ग एवं सिद्धार्थ राजमार्गको निर्माण कार्य तथा स्तरोन्नति छिटो सम्पन्न गरी अन्तर्राष्ट्रिय विमानस्थलदेखि लेकसाइडसम्म ‘बाइपास रोड’ निर्माण गर्न आग्रह गरिएको छ । यसैगरी पोखरा अन्तर्राष्ट्रिय विमानस्थल आगामी अङ्ग्रेजी नयाँ वर्षदेखि सञ्चालन हुने सुःखद् समाचारसँगै विश्वलाई चिनाउने साहसिक हवाई खेल प्याराग्लाइडिङ र अल्ट्रालाइट व्यवसायको दिगो व्यवस्थापन एवं भविष्यका लागि निश्चित समय निर्धारण वा विकल्प खोज्न माग गरिएको छ ।

 

Check Also

महाकवि देवकोटाको कविकुञ्ज सङ्ग्रहालयमा परिणत

महाकवि लक्ष्मीप्रसाद देवकोटाले जीवनका महत्वपूर्ण १० वर्ष बिताएको काठमाडौँ महानगरपालिका–३० …