तेमाल मेलामा ११ वर्षीय कान्छी झाँक्री

यसवर्षको तेमाल मेलामा ११ वर्षीय बिनिता थिङ पनि सहभागी थिइन् । मयुरको प्वाँख जडित झाँक्री टोपी लगाएकी बिनिता सेतो पहिरनमा थिइन् ।

काभ्रेकै बन्खुबाट यही मेलामा आफ्नो झाँक्री शक्ति आर्जन गर्न आएकी बिनिता राति १२ बजे नै उठेर ५ घण्टा हिँडेर तेमाल आइपुगेकी हुन् ।

यहाँ आउनु अघि उनले ९ दिन गुफा बसेर तन्त्र मन्त्र सिकेको पनि बताइन् ।

बर्सेनि झैँ यस वर्ष पनि जनैपूर्णिमाको दिन काभ्रेको ऐतिहासिक क्षेत्र तेमालमा झाक्रीहरुले विधिपूर्वक पूजा गरेर सिद्धि लिए ।

काभ्रेका विभिन्न क्षेत्रबाट आएका बोन्बो झाँक्रीहरूले नारायणको थानमा पूजा गरेर आफ्नो मात्र होइन जगतकै रक्षाको लागि समेत कामना गरेका छन् ।

जनैपूर्णिमाको दिन यसरी झाक्रीहरु भेला भएर पूजा आज गर्ने काम परापुर्वकालदेखि नै चल्दै आएको बताइन्छ । यहाँ आउनु अघि ९ दिनसम्म उपबासहितको गुफा बस्ने गर्दछन् ।

गुफाबाट निस्केर यहाँ आइ पूजा गरेपछि शक्ति आर्जन हुने उनीहरूको भनाई रहेको छ ।

झाँक्रीहरूले यहाँ झारफुक समेत गर्दछन् । उनीहरूले सामूहिक रूपमा झारफुक गर्छन् ।

बौद्ध गुरु पद्मसंभव तेमालमा बसेर तिब्बत गएको बताइन्छ । त्यसैले यस क्षेत्रलाई हिन्दु र बौद्ध दुवै धर्मावलम्बीले पवित्रस्थलको रूपमा लिन्छन् ।

यहाँ जनैपूर्णिमामा लाग्ने मेलालाई ‘जेरी’ मेलासमेत भनिन्छ । पहिला पहिला यो मेलामा आएपछि जेरी खाना पाउने भएकोले यसलाई जेरी मेला भन्न थालेको स्थानीयहरू बताउँछन् ।