विमान थप्दै निजी वायुसेवा कम्पनीहरू, कुन कम्पनीसँग कति विमान?

काठमाडौँ । पछिल्लो समय आन्तरिक तथा अन्तर्राष्ट्रिय उडान गर्दै आएका नेपाली वायुसेवा कम्पनीहरूले विमान थप्ने होडबाजी नै चलेको छ ।

आन्तरिक तथा अन्तर्राष्ट्रिय उडान गर्दै आएको बुद्ध एयर, भरखर अन्तर्राष्ट्रिय उडान अनुमति पाएको श्री एयर र आन्तरिक उडान गर्दै आएको यति एयरले पछिल्लो समय धेरै सङ्ख्यामा विमान थपेका छन् ।

बुद्ध एयरलाइन्स

एटिआर जहाजबाट उडान गर्दै आएको बुद्ध एयरले पुन: नयाँ एटिआर विमान ल्याउने तयारी गरेको छ । भारतबाट करिब १ अर्व लगानीमा ल्याउन लागेको विमान अगस्ट अन्तिमसम्म नेपाल आइपुग्ने कम्पनीले जनाएको छ ।

गत चैत्र ४ गते १ अर्व लगानीमा फ्रान्सबाट नयाँ एटिआर विमान नेपाल ल्याएको थियो । हाल बुद्ध एयरसँग ७ वटा ७२ सिटे एटिआर ७२–५००, तीन वटा ४२ सिटे एटीआर ४२–३२० र दुई वटा १८ सिटे बिचक्राफ्टलगायत १२ वटा जहाजले आन्तरिक तथा अन्तर्राष्ट्रिय उडान गरिरहेका छन् ।

बुद्धले अन्तर्राष्ट्रिय उडानमा भारतको बनारस र कोलकातामा उडान गर्दै आएको छ भने गुवाहटीमा तयारी थालेको छ । त्यस्तै आन्तरिक उडानमा भद्रपुर, विराटनगर, सिमरा, जनकपुर, भैरहवा, नेपालगन्ज, धनगढी, तुम्लिङटार, भरतपुर र पोखरालगायतका क्षेत्रमा उडान गर्दै आएको छ । बुद्धले पोखरा विमानस्थलबाट भरतपुर र भैरहवा समेत उडान गर्ने गरेको छ भने माउन्टेन क्षेत्रका आन्तरिक गन्तव्यमा उडान गर्दै आएको छ।

यति एयरलाइन्स

आन्तरिक उडान गर्दै आएको यति एयरले गत साउनमा थाइल्याण्डको राजधानी बैंककबाट पाँचौँ विमानको रूपमा ७२ सिट क्षमताको एटिआर विमान भित्र्याएको छ । यतिसँग हाल ७२ सिट क्षमताको ५ वटा एटिआर, ६ वटा जेट स्ट्रिमगरी ११ विमान छन् । यी विमानबाट यतिले आन्तरिक र माउन्टेन फ्लाइट गर्दै आएको छ ।

हाल यतिले मुख्य रुटका ८ गन्तव्यमा उडान गरिरहेको छ । यतिका प्रवक्ता भीम राईका अनुसार ६ वटा जेटस्ट्रिमबाट तुम्लिङटार, जनकपुर, भरतपुर, भैरहवा, नेपालगन्ज उडान गर्दै आएको छ । त्यस्तै एटिआर ७२ बाट भद्रपुर, पोखरा र विराटनगरमा उडान गरिरहेको छ । दैनिक ६ माउन्टेन फ्लाइट गर्ने यतिले पोखराबाट भरतपुर र भैरहवा सेवा समेत सुरु गरेको छ ।

श्री एयरलाइन्स

भदौ १ गते श्री एयरले नयाँ विमानका रूपमा ८० सिट क्षमताको टर्बो जेट इन्जिनयुक्त बम्बार्डियरको टर्बोजेट जहाज ल्याएको छ । यही महिनाभित्रमा सोही कम्पनीको अर्को जहाज नेपाल आइसक्ने जनाएको छ ।

आन्तरिक उडान गर्दै आएको एयरलाइन्स कम्पनी मध्येमा श्रीले भित्र्याएको बम्बार्डियर जहाज ठुलो हो । पछिल्लो समय नेपालमा ७२ सिट क्षमताको एटिआर जहाज मात्रै भित्रिएका थिए । आन्तरिक उडान गर्दै आएको श्रीले अन्तर्राष्ट्रिय उडान अनुमति मागेको करिब १ वर्षपछि नागरिक उड्डयन प्राधिकरण (क्यान) ले उडान अनुमति दिएको छ। अनुमति पाएपछि पहिलो चरणमा भारतमा उडानको तयारी भइरहेको श्रीका बजार व्यवस्थापक अनिल मानन्धरले जानकारी दिए ।

८० सिट क्षमता भएको सो जहाज आन्तरिक उडानमा रहेका एयरलाइन्सले उडाइरहेको मध्ये सबैभन्दा ठुलो हो । श्रीसँग हाल बम्बार्डिएरको ५० सिट क्षमताका २ वटा र ७० सिट क्षमताका २ वटा जहाज छन् । नयाँ आएको जहाजसँगै श्रीसँग ५ वटा जहाज भएका छन् । श्रीले हाल भैरहवा, नेपालगन्ज, विराटनगर, भद्रपुर र धनगढीमा उडान गर्दै आएको छ ।

त्यसै गरी सरकारी स्वामित्वमा सञ्चालित नेपाल वायुसेवा निगमले आन्तरिक तथा अन्तर्राष्ट्रिय उडान गर्दै आएको छ । आन्तरिक उडानका लागि निगमसँग ४ वटा चिनियाँ वाई–१२, २ वटा एसएमएस–६०, ३ वटा टिवनअटर गरी ८ वटा विमान रहेका छन् । त्यस्तै अन्तर्राष्ट्रिय उडानका लागि निगमसँग दुई सय ७४ सिट क्षमताको दुई थान ‘ए३३०–२००’ वाइडबडी, एक सय ५८ सिट क्षमताको दुई थान ‘ए३२०–२००’ न्यारो बडी सञ्चालनमा छन् । निगमसँग भएको पुरानो बोइङ ७५७ बिक्रीका लागि दोस्रो पटक अन्तर्राष्ट्रिय टेन्डर आह्वान गरिएको छ ।

सौर्य एयरलाइन्सले वि.सं २०७१ साल मङ्सिर १ गतेदेखि दुई वटा जेट विमानबाट आन्तरिक उडान सुरु गरेको थियो । हाल नयाँ जेट विमान ल्याउने तयारीमा छ । सिम्रिक एयर
सन् २००९ देखि आन्तरिक उडान गर्दै आएको सिम्रिकसँग हाल २ वटा बिचक्राप्ट १९०० जहाज रहेको छ ।

सीता एयरले सन् २००३ देखि ड्रोनियर–२२८ विमानबाट व्यावसायिक उडान सुरु गरेको हो । दुर्गम क्षेत्रमा उडान गर्नका लागि हाल सीता एयरसँग ४ वटा ड्रोनियर–२२८ विमान रहेको छ।

त्यस्तै तारा एयरले सन् २००९ देखी आन्तरिक उडान गर्दै आएको छ । हाल तारा एयरसँग ६ वटा विमान रहेको छ । १९–१९ सिटको ४ ट्विनअटर, २ ड्रोनियर विमानबाट ताराले दुर्गन क्षेत्रका ९ गन्तव्यमा उडान गर्दै आएको छ । जसमा फाप्लु, लुक्ला, जोमसोम, दुनै, जोमसोम, सिमरा, बाजुरा, रारा र बझाङ रहेका छन्।

समिट एयरलले सन् २०१४ बाट आन्तरिक उडान गर्दै आएको छ । तीन वटा एल ४१० युभिपी–ई२० विमान रहेको समिटले सुर्खेत विमानस्थललाई आधार बनाएर उडान गर्दै आएको छ ।

त्यस्तै हाल मुलुकभित्र २० हेलिकप्टर कम्पनी सञ्चालनमा छन् भने अन्तर्राष्ट्रिय उडानमा तीन विमान कम्पनीले गर्दै आएका छन् ।