भ्रमण वर्षभर पर्यटन होटलमा ३० प्रतिशत छुट

नेपालका पर्यटकीय होटलहरुमा नेपाल भ्रमण वर्ष २०२० अवधी भरी पर्यटकलाई छुट दिने भएको छ । होटल संघ नेपाल (हान) ले भ्रमण वर्षलाई लक्षित गरी नेपाल आउने सबै विदेशी पाहुनाका लागि छुटको घोषणा गरेको हो ।

हानका गत साता बसेको कार्य समितिको बैठकले छुटको निर्णय गरेको हो । एक वर्षभर होटेलले आफ्नो रुमको मूल्यमा ३० प्रतिशत छुट र खानामा १५ प्रतिशत छुट दिने भएको छ ।

भ्रमण वर्षका क्रममा गरिएको प्रबर्द्धनात्मक कार्यको रुपमा यसलाई लिएको छ ।

छुट हानका सदस्य होटेलमा मात्र उपलब्ध हुनेछ । हानमा ठूलो लगानीका पर्यटकस्तरीयदेखि तारे होटेल सञ्चालकहरु आवद्ध छन् । यसअघि भ्रमण वर्ष मूल आयोजक समिति बैठकले सबै सरोकारवाला निकायबाट भ्रमण वर्षलाई लक्षित गरी के गर्न सकिन्छ भनी विवरण माग गरिएको थियो ।

सोही आधारमा हानले छुट योजना सार्वजनिक गरेको हो । हानको देशभर एक दर्जनभन्दा बढी क्षेत्रीय सञ्जाल फैलिसकेको छ । यसैबीच होमस्टेहरुले पनि छुटको घोषणा गरेको छ ।