यति एयरलाइन्सद्वारा प्लाष्टिक कप विस्थापन

काठमाडौं– निजी क्षेत्रको अग्रणी वायु सेवा प्रदायक कम्पनी यति एयरलाइन्सले आफ्ना सबै जहाजमा प्लाष्टिकका कप प्रयोग नगर्ने भएको छ । एयरलाइन्सले यात्रुलाई पानी तथा अन्य पेय पदार्थ दिन प्रयोग भइरहेको प्लास्टिक कप विस्थापन गर्ने घोषणा गरेको हो ।

अबदेखि प्लास्टिकको सट्टा पेपर (कागज) कप प्रयोगमा ल्याइने कम्पनीद्वारा आइतबार जारी विज्ञप्तिमा उल्लेख छ । वातावरण संरक्षण र कार्वन उत्सर्जनमा कमी आउने कम्पनीको भनाइ छ । पेपर कपको उद्घाट गर्दै संयुक्त राष्ट्र संघ विकास नियोग (युनएनडिपी)का आवासीय प्रतिनिधि आइसियानी लेबेले वातावरण संरक्षणका लागि यती एअरलाइन्सले सकारात्मक प्रयास गरेको बताए ।

यति एअरलाइन्स नेपालमा कार्बन न्युट्रल अभियान सुरुवात गर्ने पहिलो वायु सेवा कम्पनी हो । पेपर कपसँगै यति एअरलाइन्सले थप दुई विद्युतीय कार प्रयोगमा ल्याएको छ । यतिले सहस्राब्दी दीगो विकास लक्ष्य पूरा गर्न युएनडीपीसँग सहकार्य गर्दै आएको छ ।