भ्रमण वर्षमा पर्यटकलाई २० प्रतिशत छुट दिने तयारी

विवेक गुरुङ
काठमाडौं– भ्रमण वर्ष २०२० मा पर्यटकलाई होटेल, ट्राभल लगायतका क्षेत्रमा २० प्रतिशत छुट दिने तयारी भइरहेको छ ।

भ्रमण वर्षलाई सफल बनाउन सरकारी र सरोकारवाला निकाय बीचको छलफलबाट छुट दिने निणर्यमा पुग्न लागिएको संस्कृति, पर्यटन तथा नागरिक उड्डयन मन्त्रालय पर्यटन महाशाखाका प्रवक्ता घनश्याम उपाध्याय बताए । होटेल संघ, ट्राभल एण्ड टुरिजम, होम स्टे र ट्रेकिङ एजेन्सीहरुका सेवामा २० प्रतिशत छुट दिने तयारी गरिएको हो ।

हिमाल अरोहरण, पदयात्रा, माउन्टेरिङ, फिल्म मेकिङ र राष्ट्रिय निकुञ्जहरुको प्रवेशमा पनि छुट दिनका लागि मन्त्रलायले अवधारणापत्र बनाइरहेको प्रवक्ता उपाध्यायको भनाई छ ।

वार्षिक २० लाख पर्यटक ल्याउने लक्ष्य भएको बताउँदै उपाध्यायले यसअनुसारका गतिविधि प्रवद्र्धन, जनशक्ति विकास, साझेदारी र जागरुकता आवश्यक रहेको बताए ।

भ्रमण वर्षको सुरुआतमै बिभिन्न ४० देशका पर्यटन मन्त्रीहरुको सम्मेलन तयारी रहेको उनले बताए । यसैगरी जनवरी ७ मा विदेशी नियोगहरुमा पर्यटन वर्षको प्रचार गर्ने कार्यतलिका बनाएको छ । पर्यटन वर्षले सरकारको समृद्ध नेपाल र सुखी नेपाली अभियानमा पनि सहयोग पुग्ने अपेक्षा गरिएको छ ।