काठमाडौं–पोखरा अमेजिङ मोटर र्‌याली हुँदै

काठमाडौँ– नेपाल भ्रमण वर्ष २०२० को सन्दर्भमा यही शुक्रबार (माघ २३ गते) काठमाडौँ–पोखरा मोटर र्‌याली आयोजना हुने भएको छ । भ्रमण वर्षमा मुलुकको आन्तरिक पर्यटन प्रवर्द्धन तथा क्यान्सर रोगबारे जनचेतना फैलाउने उद्देश्यले सातौँ अमेजिङ मोटर र्‌याली आयोजना गर्न लागिएको पत्रकार सम्मेलनमा जानकारी दिइयो ।

केजीएच फाउन्डेसन र रोटरी क्लब अफ काठमाडौँको सहयोगमा उक्त र्‌याली आयोजना गर्न लागिएको हो । नेपाल पर्यटन बोर्डबाट सुरू हुने र्‌याली साँझ पोखरा पुगेर समापन हुनेछ । र्‌यालीमा ४५ वटा गाडीको सहभागिता रहने र्‌यालीका संयोजक दिवाकर राजकर्णीकारले बताए ।

र्‌यालीमा सहभागी हुन १२ हजार शुल्क लाग्नेछ भने गाडीमा चार जनाभन्दा बढी बस्न पाइने छैन । सहभागीको गाडीमा ‘ट्र्याकिङ डिभाइस’ जडान गरी ‘स्पिड’ जाँच गरिन्छ । गाडीको ८५ किलोमिटरभन्दा बढी स्पिड भएमा प्रतियोगिताबाट बाहिरिनुपर्ने जनाइएको छ ।

र्‌यालीको कार्यक्रम सकेपछि भोलिपल्ट रोटरी क्लबले सराङकोटमा रहेको जनजागृति विद्यालयमा स्वास्थ्य शिविर आयोजना गर्नेछ भने विद्यार्थीलाई झोला तथा स्कुलमा स्टेसनरी वितरणसमेत गर्नेछ ।

आयोजकका अनुसार र‌्‌यालीमा प्रथम हुनेलाई कतार एयरले एउटा हवाई टिकट, द्वितीय र तृतीयलाई बुद्व एयरको माउन्टेन उडानको टिकट दिइनेछ ।