निजगढ विमानस्थल पाँच वर्ष भित्र : मन्त्री भट्टराई

वेद गुरुङ

काठमाडौं– संस्कृति पर्यटन तथा नागरिक उड्डयनमन्त्री योगेश भट्टराईले निजगढ विमानस्थल अर्जुनदृष्टिको रुपमा रहेकोले कुनै पनि हालतमा निर्माण गरिने बताएका छन् ।

नागरिक उड्ययन प्राधिकरणले बुधबार काठमाडौंमा आयोजना गरेको कार्यक्रममा बोल्दै मन्त्री भट्टाराईले सरकारको अहिलेको मिसन नै ‘कनेक्टीभिटि’मा रहेकोले निजगढ विमानस्थल पाँच वर्षभित्र निर्माण सम्पन्न गरिने बताए ।

‘गेम चेन्जर’को रुपमा रहेको निजगढ विमानस्थल जसरी पनि निर्माण गरिने उनको भनाई रहेको छ । उनले भने, ‘सरकारको हवाई, रेल, पानीजहाजमा जोड रहेको छ । प्रधानमन्त्रीको चाहना अनुरुपमा कसरी कनेक्टिभिटी बढाउन सकिन्छ त्यसमा लागि रहेको छौ ।’

पाँच वर्षमा फड्को मार्ने गरि काम गरिरहेको मन्त्री भट्टराईले बताए । उनले भने, ‘पोखरा, गौतमबुद्ध र निजगढ विमानस्थलको काम सम्पन्न गरि ब्यवसायिक रुपमा अगाडि बढाउन सकिन्छ । वार्षिक एक करोड पर्यटक नेपाल घुम्न आउने बनाउन काम गरिरहेको छु ।’

सरकारको लक्ष्य नै विकासको पूर्वाधार निर्माणमा रहेकोले यसका लागि स्थानीय, प्रदेश र संघीय सरकार मिलेर काम द्रुत गतिमा काम भइरहेको मन्त्री भट्टराईले बताए । नेपालका ५४ वटै विमानस्थलमा पूर्वाधार निर्माण बढाइ रहेको समेत उनले बताए ।

कार्यक्रममा प्राधिकरणले विगत दुई वर्षमा हवाई क्षेत्रमा गरेको प्रगति बारे कार्यपत्र प्रस्तुत गरिएको थियो । कार्यक्रममा पाँचवर्ष भित्रमा निर्माण हुने आयोजना बारे जानकारी गराइएको थियो ।