पर्यटन प्रवर्द्धनार्थ पनौतीमा ‘साइकिलिङ’

काभ्रेपलाञ्चोक । पर्यटन प्रवर्द्धनार्थ पनौती नगरपालिकाले पर्यटकीय क्षेत्र फुल्चोकी र नागीडाँडामा साहसिक खेल ‘साइकिलिङ’को सुरुआत गरेको छ । उक्त साहसिक खेल नगरको १ नम्बर वडास्थित सबैभन्दा अग्लो पर्यटकीयस्थल फुल्चोकीडाँडाबाट २ नम्बर वडाको नागीडाँडासम्म आयोजना गरियो ।

नगरपालिकाको आयोजनामा ‘फुल्चोकी टावर माउन्टेन बाइक ट्रेल’मा नेपाल, क्यानाडा र भारतका करिब २०० राइडरले साइकिलिङ गरेका थिए । साइकिलिङको नगर उपप्रमुख गीता बञ्जाराले उद्घाटन गरेकी थिइन् । छ किलोमिटर दूरी रहेको उक्त साकिलिङ ट्रेल रुटमा खेल सञ्चालन गर्न पाइनेछ । “यो गन्तव्यमा साइकिलिङका लागि खुला भएको छ, यसका लागि पर्यटन बोर्डले प्रचारमा समेत ल्याइसकेको छ”, बञ्जाराले भनिन् ।

नेपाल पर्यटन बोर्डले गत असोजमा विश्व सम्पदा सूचीमा सूचीकृतको प्रक्रियामा रहेको पनौतीको ऐतिहासिक एवं पर्यटकीय क्षेत्र प्रवर्द्धनार्थ घुम्ने स्थान र गर्न पाइने गतिविधि प्रचारमा ल्याएको थियो । यसका लागि बोर्डले नगरपालिकाभित्रका ऐतिहासिक सम्पदा एवं पर्यटकीयस्थललाई मान्यता दिँदै पर्चासमेत सार्वजनिक गरेको हो ।

उक्त नगर क्षेत्रका मनोरम पहाड, खेत, हिम–शृङ्खलाहरूको दृष्यावलोकनले आन्तरिक एवं बाह्य पर्यटकलाई आनन्द प्रदान गर्ने मनोरम स्थान रहेको बोर्डले निष्कर्ष निकालेको छ । यस्तै साहसिक पर्यटनका लागि पनौती उपयुक्त स्थान रहेको जनाउँदै नगरमा मनोरञ्जनात्मक कार्य गर्न प्याराग्लाइडिङ, रक–क्लाइमिङजस्ता खेल रहेको बोर्डले जनाएको छ ।