‘एभरेस्ट’ र ‘राइनो’ होइन, सगरमाथा र गैँडा भनौँ : प्रधानमन्त्री ओली

प्रधानमन्त्री केपी शर्मा ओलीले सगरमाथालाई ‘एभरेस्ट’ र गैँडालाई ‘राइनो’ भनेर प्रचार गरिएको भन्दै असन्तुष्टि व्यक्त गरेका छन् ।

सोमबार काठमाडौँमा सुरु भएको अन्तर्राष्ट्रिय नागरिक उड्डयन सङ्गठन (आइकाओ) को एसिया तथा प्रशान्त क्षेत्रका महानिर्देशकहरूको ५६ औँ सम्मेलनलाई सम्बोधन गर्दै उनले ‘मौलिक नाम नबिगार्न’ समेत आग्रह गरे ।

‘यो राइनो होइन, गैँडा हो गैँडा’ उनले भने, ‘यसको मौलिक नाम नबिगारौं । यो राइनो होइन ।’ उनले एक सिङे गैँडा नेपालमा मात्र पाइने पनि स्मरण गराए ।

उनले नेपाललाई सुरक्षित गन्तव्यको रूपमा पहिचान गराउनका लागि सरकारको नीति र प्रयासहरू केन्द्रित रहेको बताए । उनले नेपाल भ्रमणका लागि आउन समेत विदेशी सहभागीहरुलाई आग्रह गरे । कार्यक्रममा झन्डै चार सय विदेशी सहभागी छन् ।

साथै उनले नेपालमा हवाई सुरक्षाको क्षेत्रको क्रमिक रूपमा सुधार भएको उल्लेख गर्दै थप समस्या देखिएमा सुधारका लागि तयार रहेको पनि उल्लेख गरे । उनले भने, ‘दोस्रो अन्तर्राष्ट्रिय विमानस्थलका रूपमा निर्माणाधीन गौतम बुद्ध विमानस्थल समयमै सञ्चालनमा ल्याइने छ, नेपाल भ्रमण वर्ष २०२०को सबैलाई निम्तो छ ।’

संस्कृति, पर्यटन तथा नागरिक उड्डयन मन्त्री योगेश भट्टराईले नेपालको हवाई सुरक्षासँग सम्बन्धित रहेका विभिन्न तहसँग छलफल भएको बताउँदै नीतिगत रूपमा सुधार हुँदै आएको बताएका थिए ।

उक्त सम्मेलनमा ४३ मुलुकका २ सय ९१ प्रतिनिधि, २६ वटा प्रवर्द्धक संस्था तथा अन्य सहभागी गरी करिब ४ सय जना विदेशीको सहभागिता रहेको नागरिक उड्डयन प्राधिकरण (क्यान) ले जनाएको छ ।

प्राधिकरणका अनुसार एसिया तथा प्रशान्त क्षेत्रको हवाई सुरक्षा नीतिका लागि सुझाव सङ्कलन गर्ने उद्देश्यले उक्त सम्मेलन आयोजना गरिएको हो । एसिया प्रशान्त क्षेत्रका हवाई सेवा नियामकका महानिर्देशकहरूको सम्मेलन यसअघि नेपालमा सन् १९७८ र १९९८ मा आयोजना गरिएको थियो ।

नागरिक उड्डयन प्राधिकरणका महानिर्देशक राजन पोखरेलले नेपालमा हवाई यात्रुको सङ्ख्यामा वृद्धि हुँदै गएको भन्दै त्रिभुवन अन्तर्राष्ट्रिय विमानस्थल पूर्ण रूपमा सञ्चालनको तयारी भइरहेको जानकारी दिए ।

कार्यक्रममा आईकाओ काउन्सिलका अध्यक्ष डा. अलुमुयिवा बनार्ड अलियुलगायतले पनि सम्बोधन गरेका थिए ।

पाँच दिन चल्ने उक्त सम्मेलनबाट प्राप्त सुझाव आगामी अक्टोबरमा हुने आईकाओको वार्षिक सम्मेलनमा प्रस्तुत गरिने बताइएको छ ।