February 25, 2020

सिस्नुका परिकार खान कर्णाली होमस्टे

February 25, 2020

0 second read

रुकुम पश्चिमको मुसिकोट नगरपालिका–५, सेरीगाउँमा सञ्चालित हिमालय सिस्नो पाउडर उद्योगमा सुकाइएको सिस्नो । यहाँ उत्पादित सिस्नो पाउडर देशका विभिन्न ठाउँमा निर्यात हुने गरेको छ । तस्बिर : अमरराज पुन, रासस

मान्म– जिल्लाको खाँडाचक्र नगरपालिका–७ पिलीमा सञ्चालित कर्णाली सामुदायिक घरवास ‘होमस्टे’मा आउने पर्यटकले स्थानीय सिस्नुका परिकारलाई पहिलो रोजाइ बनाएका छन् । यसका परिकार स्वादिलो हुने भएकाले माग बढेको हो ।

होमस्टेमा आउनेले सबैभन्दा बढी स्थानीय परिकारका खाना नै बढी खोज्ने गरेका छन् । सिस्नु, कोदो, मकै र रातो चामलको परिकार बढी खोज्ने गरेको होमस्टे सञ्चालक पुत्रबहादुर मल्लले बताए । ‘यहाँ आउने स्वदेशी तथा विदेशीले स्थानीय खाना बढी खोज्ने गरेका छन्,’ उनले भने, ‘सिस्नु पहिलो रोजाइमा पर्ने गरेको छ ।’

रुकुम पश्चिमको मुसिकोट नगरपालिका–५, सेरीगाउँमा सञ्चालित हिमालय सिस्नो पाउडर उद्योगमा उत्पादित अर्गानिक सिस्नो । यहाँ उत्पादित सिस्नो पाउडर प्रतिकेजी ६५० मा बिक्री हुने गरेको छ । तस्बिर : अमरराज पुन, रासस

होमस्टेमा आउनेमा बढी स्वदेशी हुने गरेको उनीहरुले प्रायःजसोले सिस्नोको स्वाद लिने र फर्किदा सिस्नुको पीठो लैजाने गरेको सञ्चालक मल्लले बताए । ‘यहाँ आउने प्रायः नेपाली पर्यटक बढी हुने गरेका छन्,’ उनले भने, ‘स्थानीय सिस्नुको स्वाद चाख्छन् र सिस्नु पीठो घरमा पनि लैजान्छन् ।’

कालिकोट जिल्लाको खाँडाचक्र नगपालिका–७ स्थित पिलीमा सञ्चालित कर्णाली सामुदायिक होमस्टे (घरवास) । यहाँ आउने पर्यटकको रोजाइ सिस्नुका परिकार हुने गरेको छ । तस्बिर : भीमबहादुर रावल/रासस

यहाँ आउने विदेशी पर्यटकले इन्टरनेटको माग बढी गर्ने गरेका छन् । सो सुविधा नभएकोले यहाँ आउने विदेशीले लामो समयसम्म बस्न नमान्ने वडाध्यक्ष रजबहादुर मल्लले बताए । ‘होमस्टेमा विदेशी पर्यटक पनि आउँछन्,’ उनले भने, ‘विदेशी इन्टरनेटको माग बढी गर्छन् । यहाँ इन्टरनेट नहुँदा धेरै बस्न मान्दैनन् ।’

होमस्टे सञ्चालक पुत्रबहादुर मल्लले भने, ‘नेपाली पर्यटकले इन्टरनेटको खासै माग गर्दैनन्,’ उनले भने, ‘मोबाइल फोन पनि राम्रो काम नगर्ने गाउँमा विदेशी पर्यटकहरुले इन्टरनेटको माग बढी गर्छन् ।’