हाइलाइट्स टुरिजमकी क्रिएटिभ एडिटर गुरुङ पुरस्कृत

काठमाडौँ । हाइलाइट्स टुरिजमकी क्रिएटिभ एडिटर अनिता गुरुङ पूर्व प्रधानसेनापति छत्रमान सिंह गुरुङ तथा श्रीमती कमला गुरुङ पत्रकारिता पुरस्कारबाट सम्मानित भएकी छन् ।

विगत दुई दशकदेखि पत्रकारिता क्षेत्रसँग सम्बद्ध गुरुङलाई तमु (गुरुङ) सञ्चारकर्मी सङ्घले आयोजना गरेको कार्यक्रममा सूचना तथा सञ्चार मन्त्री पार्वत गुरुङले दोसल्ला ओढाएर प्रमाणपत्र तथा नगद हस्तान्तरण गरेका थिए । सञ्चारबिज्ञको रुपमा समेत परिचय बनाएकी गुरुङले रेडियो सगरमाथा, सगरमाथा टेलिभिजनलगायतका सञ्चार माध्यमहरुमा आबद्ध भएर काम गरिसकेकी छन् ।

त्यसैगरी कार्यक्रममा पूर्व प्रधानसेनापति छत्रमान सिंह गुरुङ तथा श्रीमती कमला गुरुङ पत्रकारिता पुरस्कार (गैर गुरुङ) बाट रेडियो नेपालका अमरध्वज लामा, सुश्री भद्राकुमारी घले पत्रकारिता पुरस्कार नागरिक खबरका केशव गुरुङ र इण्डिजिनियस टेलिभिजनका अनिता गुरुङ, तमू ल्होछार मूल आयोजक समिति तमू पत्रकारिता पुरस्कार नयाँ पत्रिकाका दीपेन्द्र गुरुङ, आदिकवि हर्कबहादुर गुरुङ स्मृति पत्रकारिता पुरस्कार रेडियो अन्नपूर्ण (पोखरा) का दील गुरुङ, लक्ष्मी गुरुङ पत्रकारिता पुरस्कार चितवन पोस्टका तुलमान गुरुङ र सीआइ टेकबहादुर तथा रसकुमारी गुरुङ पत्रकारिता पुरस्कारबाट नयाँ पत्रिकाका गोरखा संवाददाता केशव गुरुङ प्रदान गरिएको छ ।